Тарас Чарнавіл: Запушчаны незваротны механізм самаразбурэння Расеі

Прэзідэнт РФ заганяе сябе ў тупік і не гатовы мяняць ідэалагемы і рэцэпты дзеянняў.

Умяшаннем ва ўзброены канфлікт на Данбасе і падтрымкай баевікоў, пасля чаго рушылі ўслед санкцыі Захаду супраць Расеі, падзенне кошту нафты і зніжэнне курсу рубля, запусціўся механізм разбурэння «імперыі».

Пра гэта эксперт у міжнароднай палітыцы, дэпутат Вярхоўнай Рады 3-6-га скліканняў Тарас Чарнавіл распавёў на чаце ў «Главреде».

«Думаю, што Пуцін запусціў незваротны механізм самаразбурэння сваёй «імперыі». Відавочна, часовыя рамкі вельмі няпэўныя, але магчымасць хуткага выніку досыць высокая. Гэты развал можа быць вельмі небяспечным для ўсяго свету, таму заходнія лідэры прыкладуць усе намаганні для захаванне цэласнасці Расеі, але ужо без Пуціна», - падзяліўся меркаваннем эксперт.

Каментуючы прэс-канферэнцыю Пуціна, Чарнавіл заўважыў, што кіраўнік расейскай дзяржавы выглядаў разгубленым, загнаным у кут і пастаянна апраўдваўся.

«Упершыню нават для расейскіх назіральнікаў [Пуцін] стаў пасмешышчам. Выснова, што кароль голы, і ў яго няма плана Б, павіннна была ўстрывожыць частку расейскага істэблішменту, - кажа палітолаг. - Пуцін далей заганяе сябе ў тупік, не гатовы мяняць ідэалагемы і рэцэпты дзеянняў, не стаў гнуткім і прыстасаваным да рэалій, якія змяняюцца. Гэта тоіць сур'ёзную пагрозу. Хоць на мядзведзя ён ужо не вельмі падобны, але і пудзель, загнаны ў кут, можа перагрызці горла».

Чарнавіл мяркуе, што ідэалагічная машына Крамля дала збой: «Для Пуціна не маглі падрыхтаваць ніякіх абноўленых і адэкватных месэджаў. Новыя выклікі, якія з'яўляюцца ў самой Расеі (Чачня), заганяюць яе лідэра ў ступар - ён не можа на іх даць адэкватны адказ, акрамя састарэлага «мачыць у сарціры».

У той жа час эксперт не адмаўляе, што ў Расеі ёсць людзі, якія прагнуць больш рашучых і жорсткіх дзеянняў з боку Расеі па заваяванні Украіны, а Пуцін іх стрымлівае.

«Безумоўна, ёсць. Але расейская сістэма не прадугледжвае магчымасці агучвання і рэалізацыі іншых думак, чым тыя, якія рояцца ў чарапной каробцы цара. Да Пуціна не заходзяць са сваімі думкамі, да яго заходзяць з ягонымі думкамі», - падсумаваў палітолаг.