Лукашэнка і Пуцін пагаварылі аб Крыме
34- 18.03.2014, 21:02
- 85,550
Прэс-службы Пуціна і Лукашэнкі па-рознаму перадаюць сутнасць тэлефоннай размовы сваіх патронаў, якая адбылася сёння ўвечары.
Так, афіцыйны сайт прэзідэнта Расеі піша пра тое, што «з ініцыятывы беларускага боку адбылася тэлефонная размова Уладзіміра Пуціна з Прэзідэнтам Беларусі Аляксандрам Лукашэнкам».
«Кіраўнікі дзяржаў працягнулі абмен думкамі аб развіцці вострай крызіснай сітуацыі ва Украіне», - гаворыцца ў паведамленні.
«Адзначаную важнасць і гістарычнае значэнне рэферэндума, які адбыўся сёння - у поўнай адпаведнасці з практычна аднадушным волевыяўленнем насельніцтва Крыма - ўз'яднанне паўвострава з Расейскай Федэрацыяй», - рапартуе прэс-служба расейскага прэзідэнта.
Афіцыйны сайт беларускага кіраўніка больш стрыманы ў ацэнках.
У паведамленні гаворыцца: «Аляксандр Лукашэнка і Уладзімір Пуцін абмеркавалі шэраг актуальных пытанняў, у тым ліку абмяняліся думкамі пра Украіну і сітуацыю, звязаную з правядзеннем рэферэндуму ў Крыме».
Прэс-служба Лукашэнкі звяртае ўвагу на тое, што «кіраўнікі дзяржаў абмеркавалі таксама асобныя пытанні парадку дня Вышэйшай Еўразійскай эканамічнай рады, якая адбудзецца ў канцы красавіка ў Менску».
Нагадаем, падчас апошняга пасяджэння Вышэйшай Еўразійскай эканамічнай рады на ўзроўні кіраўнікоў дзяржаў, якая прайшла 5 сакавіка ў Маскве, Лукашэнка заявіў аб неабходнасці стварэння Мытнага саюза «без выключэнняў», г.зн. патрабаваў бязмытную расейскую нафту.