Крымскія татары сталі «жывым шчытом» перад расейскім спецназам у Керчы
7- 2.03.2014, 16:14
- 33,153
Прыблізна тысяча крымскіх татараў прыйшлі да батальёну марской пяхоты Ваенна-марскіх сіл Украіны ў Керчы ў падтрымку ўкраінскіх вайскоўцаў.
Паводле інфармацыі прэс-службы Мінабароны, у нядзелю ўзброеныя расейскія вайскоўцы прыйшлі і да гэтай вайсковай часткі. Неўзабаве крымскія татары прыехалі да дыслакацыі батальёна і сталі жывым шчытом паміж украінскімі вайскоўцамі і групай узброеных асоб.
«Такім чынам крымскія татары спрабуюць не дапусціць правакацый і незаконных дзеянняў з боку расейскіх вайскоўцаў», - дадалі ў прэс-службе.
Нагадаем, прэзідэнт Расеі Уладзімір Пуцін 1 сакавіка ўнёс у Савет Федэрацыі зварот аб выкарыстанні узброеных сіл на тэрыторыі Украіны «да нармалізацыі грамадска-палітычнай абстаноўкі ў гэтай краіне». Прычынай такіх мер у дакуменце названа «экстраардынарная сітуацыя», якая склалася ў гэтай краіне.
Раней ваенныя Расеі занялі амаль усе стратэгічныя аб'екты ў Крыме. У некаторых абласных цэнтрах на ўсходзе Украіны правакатары і сепаратысты штурмавалі адміністрацыйныя будынкі. 2 сакавіка стала вядома, што да мяжы ў раёне Харкаўскай вобласці высунутыя падраздзяленні Цэнтральнай вайсковай акругі Расеі.
Украіна звярнулася да ЗША і іншых пастаянных сяябраў Савета Бяспекі ААН, а таксама да кіраўніцтва НАТА з просьбай аб абароне тэрытарыяльнай цэласнасці. В.а. прэзідэнта краіны Аляксандр Турчынаў увёў у дзеянне пастанову Савета нацбяспекі і абароны аб прывядзенні Узброеных сіл у поўную баявую гатоўнасць.