Паветраны шар з людзьмі ўпершыню падняўся на вышыню 32 кіламетра (Відэа)

Касмічны турызм на паветраным шары стаў бліжэй да рэальнасці.

Арызонская кампанія World View Enterprises, якая абяцала да 2016 года наладзіць адпраўку касмічных турыстаў у стратасферу, на адзін крок наблізілася да рэалізацыі амбіцыйнага праекта, правёўшы паспяховыя выпрабаванні, піша NEWSru.com.

Для пробнага запуску, які адбыўся ў Розуэлле, Нью-Мексіка, была створаная паменшаная копія аэрастата і спецыяльнай гандолы, у якой павінны змяшчацца людзі. Як удакладняе AP, тэставы запуск адбыўся на мінулым тыдні, аднак вядома пра яго стала толькі напярэдадні.

Генеральны дырэктар кампаніі Джэйн Пойнтэр кажа, што распрацоўцы атрымалася пабіць сусветны рэкорд у вышыні палёту для падобных прылад, падняўшы ў стратасферу дзясятую частку ад меркаванай грузападымальнасці.

Відэазапіс перадпалётнай падрыхтоўкі, каментарыі спецыялістаў і кадры, знятыя з стратасферы, публікуе сайт Space.com.

"Мы не маглі быць не ўсхваляваныя вынікамі гэтага выпрабавальнага палёту", - кажа Джэйн Пойнтэр. Паводле яе слоў, кампанія не адмаўляецца ад абяцання наладзіць рэгулярныя палёты ў стратасферу коштам 75 тысяч даляраў з чалавека да 2016 года.

За першы год World View збіраецца ажыццявіць 50 двухгадзінных палётаў. Пры гэтым турыстам, якія знаходзяцца ў герметычных капсулах, будзе дадзены доступ у Інтэрнэт і кактэйлі.

"Яны ўбачаць Зямлю і па-сапраўднаму закахаюцца ў нашую планету, такія палёты будуць змяняць ўяўленне людзей аб свеце. Мы хочам даць гэты неверагодны вопыт столькім жадаючым, колькім зможам",- распавяла Пойнтэр.

Выпрабавальны паветраны шар праляцеў на вышыні ад 32 да 37 кіламетраў каля 15 кіламетраў. На зямлю яго ўдалося вярнуць з дапамогай парашута тыпу "крыло". Прадстаўнікі World View заявілі, што выпрабавалі рэзервовую сістэму кіравання, механізмы кіраванай пасадкі і сістэмы наземных аперацый.

Апараты World View разлічаныя на шэсць пасажыраў і дваіх чальцоў экіпажа, дадае выданне, а вышыня, на якую яны будуць падымацца, дазволіць убачыць крывіню Зямлі. Хутчэй за ўсё, камерцыйныя запускі будуць рабіцца з касмадрома ў Нью-Мексіка, але канчатковае рашэнне яшчэ не прынятае.

Нагадаем, раней кампанія абяцала пачаць выпрабавальныя палёты ў 2013 годзе, а праз некалькі месяцаў - адкрыць папярэдні продаж квіткоў.