Ідэолаг Пуціна назваў яго апанентаў хворымі, а жыхароў Захаду - расістамі

Аляксандр Дугін распавёў, чым Расея адрозніваецца ад цывілізаванага свету.

У дзіўным інтэрв'ю Der Spiegel філосаф і тэарэтык еўразійства пацвердзіў, што ўважае апанентаў Уладзіміра Пуціна за псіхічна хворых, але не адмовіў ім у праве на лячэнне. Абмяркоўваліся таксама супярэчнасці паміж элітай і грамадствам у Расеі, непазбежныя, з пункту гледжання Аляксандра Дугіна, канфлікт заходняй і ўсходняй цывілізацый, анэксія Крыму і сарваны канцэрт Мэрлін Мэнсан, піша Инопресса.ру.

"Русафобія расісцкага кшталту з самага пачатку пранізвала акцыі на Майдане, [якія праходзілі] пад лозунгам "Хто не скача, той маскаль"... Гэта гучыць прыкладна як "Хто цяпер не падыме руку, той цыган". У Нямеччыне такую ​​партыю неадкладна забаранілі б , - сказаў Дугін. - Гэта фашызм. Амерыка і Еўропа выкарыстоўваюць яго для дасягнення сваіх геапалітычных мэтаў, гэты фашызм выспяваў у Кіеве з 1990-х пры падтрымцы заходніх фондаў. Зрэшты, у вас паняцце "фашызм" размываецца: хто за Амерыку, той добры. Хто яе не прымае, таго ўважаюць за фашыста".

Не пазбег крытыкі і карэспандэнт Der Spiegel: "Вас як заходняга журналіста прызвычаілі бачыць толькі тое, што вам дазволена бачыць... Вы б не змаглі працаваць у сваім выдавецкім доме, калі б сталі сцвярджаць, што ў Кіеве ёсць фашызм".

"У розных цывілізацый розныя каштоўнасці, - прадоўжыў Дугін. - Універсальных каштоўнасцяў не існуе. Тыя каштоўнасці, якія прымаюць за універсальныя, напраўду з'яўляюцца праекцыяй заходніх каштоўнасцяў. Заходняя цывілізацыя - гэта цывілізацыя расісцкая, этнацэнтрычная. Кожны жыхар Захаду - расіст. Не ў біялагічным плане, як Гітлер, а ў культурным. Таму ён думае, што ёсць толькі адная цывілізацыя, а акрамя яе - варварства. І гэтая цывілізацыя грунтуецца на дэмакратыі, прагрэсе, правах чалавека, рынкавай свабодзе ды індывідуалістычнай ідэнтычнасці. Варварства ўсё гэта з нейкіх рэлігійных меркаваннях адмаўляе. Так думаюць жыхары Захаду, і таму яны культурныя расісты".

"Альбо вы з павагай ставіцеся да таго, што я кажу на іншай мове і што мы цяпер спрабуем выпрацаваць максімальную колькасць агульных тэрмінаў, альбо мяркуеце, што вы - носьбіт абсалютнай праўды, і з гэтага вынікае, што мы, расейцы, проста не ведаем, што такое правы чалавека, лібералізм і свабода, а вы адчуваеце сябе быццам мае права абараняць правы чалавека ў Афрыцы, Расеі і Кітаі", - заявіў Дугін.

"У Расеі кажуць, што ўсходняя цывілізацыя мае перавагу над заходняй, што Еўропа ў заняпадзе", - запярэчыў журналіст. "Я такога ніколі не казаў, - адказаў яго суразмоўца. - Я проста прытрымліваюся думкі, што цывілізацыі Захаду і Усходу зусім розныя. Усходняя мае перавагу толькі таму, што абараняецца ад расізму заходняга. Заходнік прыходзіць і кажа: прагрэс, тэхналогіі і бяспека - неад'емныя натуральныя правы - і расейцаў таксама". - "А вы ў гэтым сумняваецеся?" - "А вы не? Еўропа, відавочна, ведае ўсё, а з астатнімі размаўляе, як з ідыётамі".

"У вас праходзяць гей-парады - добра, ну і маршыруйце. Што ў нас іх не бывае, вы ўважаеце за парушэнне правоў чалавека. А мы на гэта адказваем: адчапіся! Ці вось вы хочаце растлумачыць мусульманам, што такое фемінізм, хто такія Femen і чаму жанчыны і мужчыны павінны быць раўнапраўныя. Гэта каланізацыя. Я праваслаўны хрысціянін, а вы не. Я вас прызнаю, а вы мяне не", - паскардзіўся Дугін.

"У Еўропе правы чалавека ставяць вышэй за правы калектыву, у ісламскім свеце рэлігія пераважае над правам індывіда, у Расеі гэта права абшчыны, калектыўныя правы. Пры ўсім постмадэрнізме і пры ўсёй іншай талерантнасці: вы на Захадзе не змаглі справіцца з праблемай Іншага. Для вас Іншы - гэта заўсёды нешта негатыўнае, або тое ж самае, што і вы... Вы спрабуеце нас вучыць, як развязаць гэтую праблему, але самі вы яе не развязалі", - сказаў ён.

"Дастаеўскі, Канстанцін Лявонцьеў, але ў першую чаргу Мікалай Данілеўскі і еўразійцы зусім правільна казалі, што трэба абмежаваць ўплыў заходняй цывілізацыі. Яны казалі, што ў нас ёсць уласныя каштоўнасці, найлепшы шлях.

Мы, расейцы, - не нацыяналісты, мы ніколі не былі нацыяй, - працягнуў выкладаць сваю канцэпцыю Дугін. - Кажучы пра "нашых", мы не маем на ўвазе этнічныя прыкметы. Чачэнцы і ўзбекі таксама належаць да нас. Турэцкаму або мангольскаму народу мы сказалі: цяпер вы частка праваслаўнай культуры, але пераследваць вас мы не станем. У вас будуць мячэці, вы зможаце маліцца. Калі кажуць аб праваслаўным духу народа, гэта не азначае, што іншым культурам мы абвяшчаем вайну".

"А навошта ён нам тут патрэбен?" - адрэагаваў Дугін на зададзенае следам пытанне пра зрыў канцэрта амерыканскага музыкі Мэрліна Мэнсана. Расейскім фанатам спевака ён прапанаваў "збіраць грошы і ехаць туды, дзе жыве Мэнсан". "З гэтым трэба змагацца. Але гэта толькі пачатак культурнай канфрантацыі. Расейцы адчуваюць, што іх ідэнтычнасць ў небяспецы, і абараняюцца", - патлумачыў філосаф.

"Расея хоча вызваліцца ад Захаду, але палітычная эліта шчыльна з ім звязаная... Грамадства архаічнае, эліта мадэрнізаваная. Эліта хоча мадэрнізаваць масы, вэстэрнізаваць іх, а масы хочуць русіфікаваць эліту... Нашае грамадства не жадае ніякіх "Макдональдсаў" і айфонаў. Я гатовы ад усяго гэтага адмовіцца... Тэхнічны прагрэс ідзе поруч з духоўным рэгрэсам. Я за духоўны прагрэс.

Крым - гэта частка нашай гісторыі, мы павінны зноў здабыць нашыя расейскія карані, а разам з імі і ўласную гістарычную самасвядомасць... Калі мы страцім ўсходнюю Украіну, Кіеў нападзе на Крым, і мы апынемся ўцягнутыя ў вайну. Калі мы здамо Крым, у Расеі пачнуцца акцыі пратэсту, якія прывядуць да зрынання Пуціна, а потым у нас будзе свой уласны Еўрамайдан", - перасцярог Дугін.

Прэзідэнта РФ суразмоўца журналіста ўважае за "супярэчлівую асобу". "Ёсць лунарны Пуцін і салярны Пуцін, як я іх называю, - растлумачыў Дугін. - Салярны Пуцін - гэта Пуцін, якім я хацеў бы яго бачыць. Лунарны Пуцін глядзіць на свет праз прызму дамоў, супрацоўніцтваў, паставак газу. Гэта прагматык. Яны канфліктуюць паміж сабой. Пуцін - асоба глыбока супярэчлівая. Спачатку анэксія Крыму, а потым крок за крокам рух у процілеглым кірунку".

Пра тых, хто пасля думскіх выбараў 2011 года выйшаў у знак пратэсту на Балотную плошчу, Дугін сказаў: "Гэта ўсё ворагі Расеі... Пятая калона - гэта тыя лібералы, якія разглядаюць Расею як частку заходняга свету, яны супрацьстаяць Пуціну. Шостая ж калона акапалася ва ўладзе, яна жыве і працуе разам з Пуціным. Розніца ў тым, што пятая калона супраць Пуціна, а шостая - за яго. Але ўсе яны ліберальныя заходнікі".

"Тыя, хто нападае на Пуціна, нападаюць на большасць. Гэта не нармальна з псіхічнай пункту гледжання. Ці трэба дапускаць адхіленні ад нормы? Трэба. Ці трэба рабіць з ненармальнасці норму? Не трэба. Таму людзі, якія не падтрымліваюць Пуціна, псіхічна ненармальныя. Але псіхічна хворыя маюць права на лячэнне, на падтрымку", - сказаў на заканчэнне Дугін.