Жырыноўскі балатуецца на «выбарах» у Крыме

Лідар ЛДПР Расеі Уладзімір Жырыноўскі ўзначаліў партыйны спіс на выбарах у так званы Заканадаўчы сход Севастопаля.

Пра гэта паведамілі сёння ў гарадской партарганізацыі, піша Украінская праўда са спасылкай на аксёнаўскае (Аксёнаў - незаконна абвешчаны прэм'ер Крыма) выданне Крыминформ.

У гарадской партыйнай арганізацыі ЛДПР паведамляюць: Жырыноўскі ў спісах сапраўды першы, другі - дэпутат Дзярждумы, куратар севастопальскай арганізацыі ЛДПР Раман Худзякоў.

«Жырыноўскі з задавальненнем разгледзіць пытанне, калі яму прапануюць узначаліць заканадаўчы сход горада Севастопаля, калі партыя ЛДПР набярэ тут большасць», - заявіў Худзякоў журналістам.

Акупацыйная ўлада Крыму прызначыла выбары на 14 верасня.

Лідар ЛДПР Уладзімір Жырыноўскі вядомы сваёй антыўкраінскай пазіцыяй.