Налётчык на абменнік у ГЦ «Шчасце» быў узброены пнеўматыкай

Следчым камітэтам устаноўленыя акалічнасці захопу закладніка ў ГЦ «Шчасце» у Менску.

Пра гэта гаворыцца ў паведамленні СК.

«Устаноўлена, што 1 кастрычніка 2014 мужчына, 1991 года нараджэння, знаходзячыся ў ГЦ «Шчасце», пранік у абменны пункт валют, упіхнуў супрацоўніцу банка назад у памяшканне ў той час, калі яна выходзіла з яго, каб пайсці на абед. Пасля чаго, пагражаючы касірцы прадметам візуальна падобным на пісталет, завалодаў грашовымі сродкамі банка, аднак пакінуць памяшканне абменнага пункта не змог па незалежных ад яго акалічнасцях.

Пазней, знаходзячыся ў памяшканні абменнага пункта валют і ўтрымліваючы ў якасці закладніка касірку, 1995 года нараджэння, ён патрабаваў у супрацоўнікаў міліцыі забяспечыць яго бесперашкодным сыход з выкрадзенымі грашовымі сродкамі.

Тры гадзіны перамоў вынікаў не прынеслі, у сувязі з чым была прынятая пастанова аб правядзенні сілавой аперацыі. У выніку прафесійных дзеянняў супрацоўнікаў СПБТ «Алмаз» падазраваны быў абясшкоджаны. Закладніца падчас захопу не пацярпела, ёй была аказана псіхалагічная дапамога.

Падчас расследавання крымінальнай справы следчымі праведзены вычарпальны комплекс следчых дзеянняў, накіраваны на высвятленне ўсіх абставінаў таго, што здарылася: вывучаныя запісы камер відэаназірання, дапытаныя дзесяткі сведак. Згодна з заключэннем балістычнай экспертызы, прадмет, які знаходзіўся ў руках нападніка, з'яўляецца пнеўматычным пісталетам вонкава цалкам ідэнтычным баявому пісталету сістэмы Макарава.

Пасля поўнага і дэталёвага вывучэння ўсіх абставінаў таго, што адбылося, следствам прынятая пастанова аб спыненні крымінальнай справы ў сувязі са смерцю асобы, якая ўчыніла грамадска-небяспечнае дзеянне», - гаворыцца ў паведамленні.

Нагадаем, 1 кастрычніка 23-гадовы жыхар Мастоўскага раёна ўварваўся ў пункт абмену валют «БелСвісБанк» у ГЦ «Шчасце» на праспекце Незалежнасці ў Менску (ст. метро «Усход») падчас абедзеннага перапынку. Ён быў узброены і ўзяў у закладнікі 18-гадовую касірку. Праз тры з паловай гадзіны налётчык быў абясшкоджаны, на наступны дзень ён памёр у бальніцы.

Фота: onliner.by