Bloomberg: Пуцін губляе падтрымку сяброў-алігархаў

Атачэнне Уладзіміра Пуціна скарацілася з дзясяткаў паплечнікаў-алігархаў да невялікай групы прыхільнікаў ягонага курсу.

Як паведамляе "Европейская правда", пра гэта піша Bloomberg і спасылаецца на двух даўніх партнёраў Пуціна, якія пажадалі захаваць ананімнасць праз страх рэпрэсій.

Падзенне рубля толькі ўзмацніла пратэстныя настроі ў найбліжэйшым атачэнні Уладзіміра Пуціна. На фоне гэтага расейскі прэзідэнт стаў з усё большым падазрэннем ставіцца да тых, хто абавязаны яму сваім станам і хто шмат страціў праз санкцыі ЕЗ і ЗША.

Агенцтва пры гэтым адзначае, што 21 самы багаты чалавек у краіне цягам мінулага года страцілі ў агульнай складанасці $61 млрд. сукупнага стану. Праз анексію Крыма пачаў скарачацца эканамічны рост Расеі, інфляцыя вырасла да 11,4% - што з'яўляецца самым высокім паказчыкам сярод дзесяці найбуйнейшых эканомік свету, рубель аслабеў на 45%, болей за любую валюту, якая адсочваецца Bloomberg. На фоне пагаршэння сітуацыі на ўсходзе Украіны нарастае трывога фінансавай і палітычнай эліты РФ у сувязі з чаканнем новых выдаткаў.

Са слоў палітычнага дарадцы Пуціна Сяргея Маркава, які дапамагаў кантраляваць правядзенне рэферэндуму ў Крыме, бізнэсмэны, якія былі даўнімі паплечнікамі расейскага прэзідэнта "зараз на перыферыі". Зараз бліжэйшае атачэнне прэзідэнта РФ складаюць сакратар Рады бяспекі РФ Мікалай Патрушаў, кіраўнік ФСБ Аляксандр Бортнікаў, кіраўнік Службы знешняй выведкі Міхаіл Фрадкоў і міністр абароны Сяргей Шайгу.

Сацыёлаг Вольга Крыштановская лічыць, што для Пуціна настаў вельмі цяжкі час: "Яго крытыкуюць з абодвух бакоў - і лібералы, і "ястрабы". Паводле яе інфармацыі, у Крамлі шмат хто лічыць, што Расея павінная заняць яшчэ больш жорсткую пазіцыю. "Магчыма, яна яе ўжо і заняла", - адзначае агенцтва. Прэс-сакратар Пуціна Дзмітрый Пяскоў сказаў Bloomberg, што яму нічога не вядома пра незадаволенасць каго-небудзь у асяроддзі прэзідэнта ягонай цяперашняй палітыкай у дачыненні да Украіны.