На жыхароў «павесілі» аплату смеццеправода, якога ніколі не было

Жыхары менскіх пяціпавярховак атрымліваюць «жыроўку» з выдаткамі на абслугоўванне смеццеправода, якога ў дамах ніколі і не было.

Жыхары старых пяціпавярховак №4 і 8 на вуліцы Чыгладзэ тры месяцы запар атрымліваюць квітанцыі на аплату жыллёва-камунальных паслуг з графой «абслугоўванне смеццеправода». Дому №8 больш за 40 гадоў, і ўсе гады жыхары самі выносілі і выкідалі смецце ў бакі. А тут - смеццеправод!

Хтосьці выказаў здагадку, што пасля шматгадовых абяцанняў ў доме пачнецца капітальны рамонт з мадэрнізацыяй, падчас якога і ўсталююць сцёкі для адходаў. Маўляў, для гэтага сродкі і патрэбныя. Іншыя меркавалі, што бухгалтар пераблытаў дамы. Сёй-той нават старанна абследаваў лесвічныя клеткі - раптам смеццеправод сапраўды ёсць, але ніхто яго не бачыць, піша minsknews.by.

Выдаткі па дому за абслугоўванне смеццеправода ў кастрычніку склалі 216 тыс. рублёў, у лістападзе - ужо 423 тыс. рублёў. І ў снежні віртуальная паслуга засталася з загадкавай паметкай: «нарад ад 30.11.14 УП ЖЭС-66». Жыхары дамоў звярнуліся да дырэктара ЖЭС-66 за тлумачэннем. Ён здзівіўся не менш іх, абяцаў разабрацца і ператэлефанаваць. Час ішоў, адказу не было.

У РДЦ, да якога належыць ЖЭС-66, паведамілі:

- Мы налічваем плату толькі па кожнай кватэры індывідуальна і на падставе звестак ЖЭС. А што там напісалі па доме - разбірайцеся з імі. Паслуга «абслугоўванне смеццеправода» у раздзеле «Дадатковая інфармацыя» па некаторых адрасах ўнесена выпадкова. Раней у «жыроўцы» значыўся пункт 10 - «абслугоўванне смеццеправода, размяшчэнне кантэйнерных пляцовак». З кастрычніка мінулага года ўведзена новая форма рахунка-паведамлення на аплату жыллёва-камунальных паслуг. Так як праграма яшчэ да канца не адладжаная, у яе укралася памылка. Аднак жыхарам дамоў не варта турбавацца. Яны плацяць за тэхабслугоўванне строга па ўстаноўленым тарыфе - 709,60 рубля за 1 квадратны метр кватэры. Ніякія дадатковыя выдаткі ім не пагражаюць.

На гэтым можна было б і супакоіцца. Аднак з часу ўвядзення новаўвядзенні прайшло ўжо чатыры месяцы. Чаму ж дагэтуль памылка не выпраўленая? Да таго ж квітанцыя на аплату жыллёва-камунальных паслуг - не проста паперка, на якой можна напісаць усё што заўгодна. Людзі павінны ведаць, за што і колькі плацяць, а таксама куды ідуць грошы на тэхнічнае абслугоўванне.