Станіслаў Багданкевіч: У Лукашэнкі адно выйсце - ехаць у Маскву на паклон

Апошнія заявы дыктатара аб эканоміцы Беларусі супярэчаць здароваму сэнсу.

17 лістапада Аляксандр Лукашэнка сустрэўся з кіраўніком місіі МВФ што да Беларусі Пітэрам Долманам.

Беларускі дыктатар зрабіў дзве ўзаемавыключальныя заявы.

«Павінен сказаць, што ў мяне ніводзін пункт, які прапануецца, не выклікае ніякага пярэчання, ніякай алергіі», - сказаў Лукашэнка.

А з іншага боку, «мы не маем намеру ламаць тую схему сацыяльнай дзяржавы, якая намі выпрацаваная».

19 лістапада заканчвае працу місія МВФ, якая павінна вызначыць лёс трохмільярднага крэдыту. Фонд гатовы выдаць крэдыт, але толькі пад рэформы. Дык ці гатовыя беларускія ўлады пачаць рэформы наўзамен на грошы?

Былы старшыня Нацбанку Беларусі Станіслаў Багданкевіч у інтэрв'ю «Беларускай праўдзе» не змог адказаць на пытанне.

- Гучаць вельмі супярэчлівыя заявы, а абстаноўка ў эканоміцы склалася вельмі цяжкая. Здавалася б, што ўлады пойдуць на рэформы ў імя эканомікі, але заявы Лукашэнкі супярэчаць здароваму сэнсу.

- А ці можа Беларусь пачакаць з рэформамі, ці ёсць час?

- У Беларусі няма часу чакаць. Безумоўна, рэформы можна не праводзіць, калі не звяртаць увагі на падзенне ўзроўню жыцця насельніцтва, на падзенне ВУП, экспарту, імпарту. Можна не звяртаць увагі на пагаршэнне жыцця народа, пагаршэнне сітуацыі і не праводзіць пераўтварэнні ў эканоміцы.

- Але што ўлады могуць прапанаваць наўзамен?

- Выхад адзін - ехаць у Маскву. Калі Лукашэнка выб'е з Расеі крэдыт і паспрабуе падтрымліваць узровень жыцця насельніцтва, то, мабыць, можна адкласці рэформы. Эканоміка будзе падаць, а народ будзе жыць за кошт замежнай запазычанасці.

Гэта дрэнны шлях для эканомікі, для народа, але магчымы пры цяперашняй уладзе. Кіраўнікі думаюць захаваць статус-кво ў імя захавання ўлады. Пры гэтым яны не задумваюцца, што будзе без рэформаў. Прынамсі ўсё дарадцы пачынаюць з падтрымкі рэформаў, а сканчаюць адмаўленнем рэформаў, бо ў народа няма такой патрэбы.

- Колькі яшчэ Беларусь можа працягнуць на вонкавых пазыках?

- Я думаю, што Расея можа падоўжыць статус-кво мінімум на год. Калі Расея дасць 3 мільярды, то сітуацыю можна закансерваваць на год. Улічваючы, што сёння назіраецца збалансаванасць замежнага гандлю, збалансаванасць плацежнага балансу - стабілізацыя ёсць. Але ідзе падзенне эфектыўнасці, падзенне экспарту, падзенне імпарту, падзенне заробкаў, абясцэненне пенсій і заробкаў на фоне існай інфляцыі ды дэвальвацыі нацыянальнай валюты. Пагаршэнне ў наяўнасці, аднак яго пакуль нельга назваць абвалам ці рэвалюцыяй. Народ прыстасуецца да больш нізкага ўзроўню жыцця - ужо прыстасаваўся. На радзіме, дзе пахаваныя мае бацькі, - пад Маладзечна ўсе атрымліваюць заробак па два з паловай мільёны і такую ж пенсію.