Менчукі пратэстуюць супраць вышак МТС побач з жыллём
19- 18.03.2015, 14:19
- 16,048
Жыхары дома №45 па вуліцы Прытыцкага ў Менску пратэстуюць супраць устаноўкі ў двары будынка вышкі мабільнай сувязі.
Увечары 17 сакавіка яны сабраліся ля аднаго з пад'ездаў, каб выказаць сваю нязгоду прадстаўніку кампаніі МТС.
У інтэрв'ю БелаПАН адна з жыхарак распавяла: «Сутнасць канфлікту вось у чым... Два тыдні таму ў нас у двары пачаліся будаўнічыя работы ўстаноўкі базавых станцый для ўзмацнення сотавай сувязі МТС. Усё гэта вельмі шкодна для здароўя чалавека, бо станцыі будуць знаходзіцца паблізу ад дзіцячай пляцоўкі і жылога будынка. Неабходна гэтаму супрацьстаяць, бо мы тут павольна, але ўпэўнена загінем».
«У Еўропе такія аб'екты выносяцца за межы жылых масіваў, - заўважыў іншы ўдзельнік сустрэчы. - Таму давайце выконваць еўрапейскія нормы. А так, паглядзіце, дзіця гадавалае павінна гуляць на «катакомбах», сярод раскопак. Гэта ў еўрапейскай краіне?»
Некалькі мужчын пачалі засыпаць траншэю, выкапаную будаўнікамі для пракладкі кабелю да станцыі. «Вось закопваю траншэю для высакавольтнага кабелю МТС, - патлумачыў адзін з іх. - У Еўропе ж не ставяць гэтыя перадатчыкі ля жылых дамоў - а ў нас, талерантных беларусаў, усё можна».
Прадстаўнікі МТС ад каментароў адмовіліся. 18 сакавіка прызначаная чарговая сустрэча грамадзян з кіраўніцтвам аператара мабільнай сувязі.