На выплату дапамог няма грошай

Крызіс у Беларусі становіцца ўсё больш сур'ёзным і ўжо замахваецца на самыя стабільныя каштоўнасці - дэкрэтныя дапамогі.

У рэдакцыю Onliner.by звярнулася маладая настаўніца Крысціна, якая адразу пасля педкаледжу была размеркаваная ў вясковую школу-садок у Магілёўцах у Пружанскім раёне.

Маладая мама знаходзіцца ў дэкрэце і кожны месяц 15-га дня атрымлівае належныя 2 млн 300 тысяч рублёў дзіцячай дапамогі. Але ў сакавіку грошы на картку не прыйшлі. «Дэкрэтны адпачынак затрымалі ўжо на 10 дзён, і я баюся, што не атрымаю іх зусім!» - усхваляваная Хрысціна. Журналісты высвятлялі лёс дзіцячай дапамогі ў Пружанскім райвыканкаме.

«Я тэлефанавала ў бухгалтэрыю, высвятляла, у чым справа. Мяркуючы з усяго, я не адная такая. Мне сказалі чакаць канца месяца. Але ж канец сакавіка ўжо фактычна наступіў, а грошай усё няма! Баюся, застануся без дапамогі, а жыць жа на нешта трэба. Добра, што ў мяне ёсць муж, але калі ў такой сітуацыі апынуліся самотныя маці? Як ім наогул выжыць? Калі шчыра, я не разумею, як такое можа быць, бо дапамогі выплачваюцца з дзяржаўнага бюджэту. Якія тут могуць быць затрымкі?» - здзіўляецца Хрысціна.

На пытанні маладой настаўніцы адказалі ў бухгалтэрыі аддзела адукацыі, спорту і турызму Пружанскага райвыканкама.

«Гэта нельга назваць затрыманнем дапамогі. Паводле пастановы дапамога прыраўноўваецца да тэрміна выплаты заробку. У нас ёсць заробак, а ёсць аванс. Таму існуюць два тэрміны выплаты заробку: 15 і 28. Так што 28 сакавіка, у тэрмін авансу, ці нават у пятніцу, 27-га, усе атрымаюць дапамогу. Мы не парушаем заканадаўства. Нам давялося перанесці тэрмін выплаты ў сувязі з нястачай сродкаў у раёне. Мы замовілі грошы ў Берасці дадаткова, далі заяўку, пакуль чакаем. Раней такога не было», - канстатавалі ў райвыканкаме.

Гэты выпадак стаў вядомы грамадскасці дзякуючы таму, што абураная маладая мама звярнулася ў СМІ, але колькі такіх фактаў агулам у краіне і ці маюць яны месца, невядома. Бо цярплівыя беларусы, асабліва ў правінцыі, аддаюць перавагу маўкліва чакаць, шчыра верачы ў беларускую «стабільнасць», піша «Беларускі партызан».

Але, відавочна, што сітуацыя становіцца ўсё больш сур'ёзнай. Бо не ад добрага жыцця ўлады абкладаюць беларусаў усё большымі падаткамі - з гэтага года падаходны падатак вырас з 12% да 13%, улады прыдумалі для беларусаў падатак на пазыкі, а неўзабаве ў краіне з'явіцца падатак на «дармаедства».

Тым часам прапаноў працоўных месцаў на рынку працы становіцца ўсё менш, а беспрацоўных - усё больш. Прадпрыемствы звальняюць або адпраўляюць у вымушаныя адпачынкі людзей сотнямі.

Мабыць, хутка чыноўнікі, якія не перастаюць нават у крызіс красці і раскашаваць прапануюць беларусам плаціць падатак на паветра і сонечнае святло. Прынамсі, нямногія беларусы гэтаму здзівяцца.