Праект дэкрэта аб «дармаедах» унесены ў Саўмін

У дакуменце прапісана, каму давядзецца заплаціць падатак.

Праект дэкрэта «аб стымуляванні занятасці грамадзян» унесены ў Савет Міністраў Беларусі.

Пра гэта сёння журналістам паведаміў начальнік галоўнай управы падаткаабкладання фізічных асоб Міністэрства падаткаў і збораў Міхаіл Расолька, паведамляе БелТА.

Цяпер урад ва ўстаноўленым парадку ўзгадняе праект дэкрэта з іншымі органамі. Пасля гэтага дакумент будзе ўнесены Лукашэнку на разгляд.

Міхаіл Расолька распавёў, што ў праекце дэкрэта дакладна прапісана, каму давядзецца заплаціць падатак, а каму не. Да апошніх належаць бацькі малалетніх дзяцей, інваліды. Прадстаўнік міністэрства падкрэсліў, што дэкрэт накіраваны на тое, каб зліквідаваць практыку, калі працаздольныя грамадзяне, афіцыйна нідзе не працоўныя, атрымліваюць ценевыя даходы, не плацяць падаткі і пры гэтым карыстаюцца ўсімі сацыяльнымі выгодамі, якія дае дзяржава.

Раней паведамлялася, што згодна з дакументам, працаздольныя грамадзяне, якія на працягу шасці месяцаў не плацілі падаткі, абавязаныя раз на год аплачваць збор сумай 20 базавых адзінак. За ўхіленне, несвоечасовую або няпоўную выплату збору будзе прадугледжаная адміністрацыйная адказнасць.

З ініцыятывай штрафаваць і караць беспрацоўных арыштам выступіла Міністэрства ўнутраных спраў. Пасля ўхвалення ідэі Лукашэнкам адпаведны дэкрэт быў распрацаваны Міністэрствам працы і сацыяльнай абароны.

Чальцы ўрада папярэджваюць таксама, што збор за дармаедства ня легалізуе шэрых заробкаў або бізнэсу. Калі падатковая інспекцыя знойдзе факты таго, што чалавек усё ж атрымліваў даход, то супраць яго будуць ужытыя дадатковыя санкцыі.