За шыкоўны палац Лукашэнкі да гэтага часу не расплаціліся?

Кампанія «Ісакідыс Гранітэс» не атрымала грошай за аздабленне гранітам і мармурам новага прэзідэнцкага палаца.

Чытач charter97.org напісаў ліст, у якім распавёў пра тое, што вось ужо больш за год замежнай кампаніі «Ісакідыс Гранітэс», якая была галоўным падрадчыкам у аздабленні мармурам і гранітам новага прэзідэнцкага палаца на праспекце Пераможцаў, заказчык не аддае грошы за выкананыя працы. Цяпер супрацоўнікаў кампаніі выклікаюць на допыты ў межах распачатай крымінальнай справы - спадзяемся, што ў якасці сведак.

«Ужо больш за год заказчык вінен фірме велізарныя грошы. Дзяржава прыцягнула Дэпартамент фінансавых расследаванняў Дзяржкантролю. Следчым камітэтам распачатая крымінальная справа з эканамічных меркаванняў. Цяпер работнікаў стала выклікаюць у сувязі з крымінальнай справай. Людзі моцна напалоханыя, баяцца несправядлівасці і перагібаў следства. Калі ласка, зрабіце гэтую інфармацыю галоснай, не дайце цішком пакараць людзей!» - напісаў ён.

У арганізацыі «Ісакідыс Гранітэс» charter97.org інфармацыю пацвердзілі, але ад разгорнутага каментара адмовіліся.

«Вяртанне грошай, так бы мовіць, у працэсе. Толькі вось гэты працэс штосьці зацягнуўся. Акрамя таго, там жа акрамя грошай яшчэ куча пытанняў: і з Дзяржкантролем, і са следствам... Зразумейце правільна», - сказаў супрацоўнік кампаніі.

У Следчым камітэце журналісту charter97.org адразу адказ даць не змаглі. Не пацвердзілі інфармацыю і праз суткі. Начальнік аддзела інфармацыі і сувязі з грамадскасцю цэнтральнага апарата Следчага камітэта Сяргей Кабаковіч адзначыў, што справа, калі яна ёсць, можа быць «дзе заўгодна».

«Адно магу сказаць дакладна, што ў цэнтральным апараце Следчага камітэта такіх матэрыялаў няма. А ў астатнім - далей па меры магчымасці ўдакладняем інфармацыю, зыходзячы з атрыманых звестак. Але гэта справа можа быць дзе заўгодна, скажу вам шчыра, бо следчых падраздзяленняў у нас шмат і ад размяшчэння арганізацыі не залежыць», - сказаў ён.

Нагадаем, новы палац Лукашэнкі пачалі будаваць у 2011 годзе. Будоўлю вяло ААТ «Менскпрамбуд», а заказчыкам аб'екта стала ўправа капітальнага будаўніцтва Менгарвыканкама.

Нядаўна ў новым прэзідэнцкім палацы адбыліся перамовы лідараў «нармандскай чацвёркі», якія доўжыліся 15 гадзін.

Даведка:

Кампанія «Ісакідыс Гранітэс» заснаваная ў 1996 годзе. Ужо больш за 18 гадоў прадпрыемства з'яўляецца лідарам у галіне каменеапрацоўкі ў Рэспубліцы Беларусь і за яе межамі. На прадпрыемстве працуе больш за 300 прафесіяналаў. У групу кампаній «Ісакідыс Гранітэс» уваходзіць архітэктурна-будаўнічая кампанія «Білітон», якая з'яўляецца будаўнічым падраздзяленнем.