Імпартны алкаголь у Беларусі можа знікнуць з прылаўкаў

Ужо ўвосень сітуацыя з пастаўкамі імпартнага алкаголю на беларускі рынак можа кардынальна змяніцца.

20 лютага гэтага года Аляксандр Лукашэнка падпісаў Дэкрэт №2, які значна мяняе парадак допуску да абарачэння алкагольнай прадукцыі. Для таго каб юрыдычнай асобе дазволілі займацца пастаўкамі алкаголю ў Беларусь з-за мяжы, яна павінна як мінімум на 25% належаць дзяржаве.

Адпаведныя дакументы павінны быць пададзеныя рэгістрацыйнаму органу ўжо да першага ліпеня. А першага кастрычніка ўсе цалкам прыватныя кампаніі-імпарцёры будуць вымушаныя спыніць сваю дзейнасць. Пры гэтым дзяржава, устанавіўшы такое жорсткае рэгуляванне, не прапаноўвае ім якіх-небудзь спосабаў рэструктурызацыі бізнэсу або іншых захадаў для прывядзення яго ў адпаведнасць з новым заканадаўствам, піша «Ежедневник».

У якасці спонсара Bacardi Legacy Cocktail Competition выступіла група кампаній Garcia. Яе саўладальнік Сяргей Цюшкевіч мяркуе, што ўвядзенне новых правіл вельмі хваравіта адаб'ецца на алкагольным рынку і прывядзе да яго радыкальнай змены. Замежныя інвестары з неспакоем сустрэлі навіны беларускага заканадаўства, магчыма, нас чакае адток замежнага капіталу з галіны. Пры гэтым дзяржава не прапануе бізнэсу гарантый, што не з'явіцца новых патрабаванняў да імпарцёраў алкаголю, напрыклад, далейшага павелічэння дзяржаўнай дзелі.

Як дзяржаўныя кампаніі будуць наладжваць дзелавыя сувязі з вытворцамі алкаголю пакуль незразумела. З аднаго боку міжнародным алкагольным кампаніям у кожным выпадку трэба прадаваць сваю прадукцыю. З іншага - надзейнасць беларускага рынку цяпер будзе выклікаць вялікія пытанні. Складана растлумачыць прадстаўнікам амерыканскага і еўрапейскага бізнэсу, чаму іх даўнія партнёры з прыватнай формы ўласнасці вымушаныя згортваць сваю дзейнасць. Такім чынам, можа скласціся сітуацыя, калі ў крамах будзе дэфіцыт замежных віскі, джыну і рому.