МЗС Літвы выклікае амбасадара РФ праз расейскія вайсковыя караблі
- 30.04.2015, 16:24
- 2,805
Расейскага пасла выклікалі ў МЗС Літвы.
Міністр замежных спраў Лінас Лінкявічус у чацвер сказаў, што Расея перашкаджае правядзенню работ у пракладцы электракабеля ў Швэцыю па дне Балтыйскага мора. З ягоных слоў, такім чынам Масква парушае канвенцыю ААН. Міністр запатрабаваў, каб падчас расейскіх вайсковых вучэнняў у Балтыйскім моры судны мянялі курс, паведамляе ru.DELFI.lt.
«Найбліжэйшым часам будзе выкліканы амбасадар Расеі, і мы заявім пратэст», - сказаў міністр.
Са слоў Лінаса Лінкявічуса, Літва ўжо накіравала Расеі тры такія ноты, аднак адказу не атрымала.
«Гэта, на жаль, паўтараецца не першы раз з сакавіка месяца. ВМС Расейскай Федэрацыі, на наш погляд, парушаюць Канвенцыю ААН у марскім праве, парушаюць права міжнароднага суднаходства і перашкаджаюць эканамічнай дзейнасці ў эканамічнай зоне», - сказаў Лінкявічус.
Літоўскі прэм'ер Альгірдас Буткявічус сказаў журналістам, што судна, якое гарантуе бяспеку пракладкі кабелю, было «справаджанае расейскім суднам з гэтай зоны».
Работы пракладкі электракабелю NordBalt вядуцца з мінулага года. Увесці гэтую змычку ў эксплуатацыю намячаецца ў снежні гэтага года. Гэтая смычка дазволіць інтэграваць літоўскі электраэнергетычны рынак у адзіны рынак рэгіёну дзяржаў Балтыйскага мора. Цягам апошніх гадоў Літва больш за палову ўсёй электраэнэргіі імпартавала з Расеі.