Карымаў адмовіўся прыехаць на юбілей Перамогі ў Маскву

Прэзідэнт Узбекістана Іслам Карымаў адмовіўся ўдзельнічаць у святочных ўрачыстасцях з нагоды 70-годдзя Перамогі ў Маскве.

Пра гэта паведамляе газета «Новы век» са спасылкай на адпаведную заяву неназванага прадстаўніка прэс-службы прэзідэнта рэспублікі. Са слоў чыноўніка, у краіне шырока адзначаць гэтую падзею, будзе праведзены шэраг мерапрыемстваў. «Кіраўнік дзяржавы будзе браць самы актыўны ўдзел у гэтых мерапрыемствах», - падкрэсліў суразмоўца газеты.

Пры гэтым афіцыйных каментароў па ўдзелу Іслама Карымава ва ўрачыстасцях 9 траўня ў сталіцы Расеі пакуль не было.

Раней ад запрашэння Крамля наведаць у святочныя дні Маскву адмовіліся прэзідэнты Польшчы, Фінляндыі, Паўднёвай Карэі, Чарнагорыі, Ізраіля, Балгарыі, Малдовы, Літвы, Латвіі, Турцыі, Эстоніі, многіх іншых краін. Канцлер ФРГ Ангела Мэркель мае намер прыехаць у Маскву толькі 10 траўня.

Найчасцей згадваюць у інфармацыйным полі адмову з боку беларускага дыктатара Аляксандра Лукашэнкі прыехаць у Маскву ў Дзень Перамогі. Ён патлумачыў сваю пазіцыю тым, што павінен прымаць парад у Менску. Таксама кіраўнік не падтрымаў палітыкаў, якія адмаўляюцца прыехаць на ўрачыстасці ў гонар 70-годдзя Перамогі ў Расею.