«Пінскі мясакамбінат» перайшоў пад крыло Шэймана

Управа справамі Лукашэнкі абзавядзецца новым актывам.

Пад кантроль установы пяройдзе "Пінскі мясакамбінат". Дэ-юрэ працэдура перадачы была аформленая пастановай Саўміна №343 ад 27 красавіка. Згодна з дакументам, урад Беларусі прыняў пастанову аб бязвыплатнай перадачы 5,87 млн акцый ААТ "Пінскі мясакамбінат" на агульную суму 34,77 млрд рублёў з уласнасці Пінскага раёна і Берасцейскай вобласці ва ўласнасць Рэспублікі Беларусь, піша tut.by.

"Пінскі мясакамбінат" пяройдзе ў падпарадкаванне ўправы справамі Лукашэнкі. Дзель УДП складзе больш за 97% ", - распавяла інфармаваная крыніца.

У пачатку красавіка правадыр падчас сустрэчы з кіраўніком управы справамі прэзідэнта Віктарам Шэйманам ухваліў стварэнне ў складзе ўстановы шэрагу новых прадпрыемстваў, якія будуць займацца вытворчасцю і перапрацоўкай мяса. Аднак, са слоў інфармаванай крыніцы, ідэя стварэння буйнога сельгаспадраздзялення пры УДП належыць намесніцы Шэймана Надзеі Каткавец, якая доўгі час займала пасаду намесніцы міністра сельскай гаспадаркі і харчавання.

"Пінскі мясакамбінат" складаецца з вытворчасці, размешчанай ў заходняй частцы Пінска, сямі фірменных гандлёвых аб'ектаў у Берасцейскай вобласці, а таксама сельгаспрадпрыемства "Невель". Вытворчыя магутнасці камбіната складаюць 50 т мяса за змену, 8,5 т каўбасных вырабаў за змену, у тым ліку 2 т прадуктаў са свініны і ялавічыны. Фактычна выпрацоўваецца каўбасных вырабаў - да 25 т на дзень, прадуктаў са свініны і ялавічыны да 2 т. Паводле звестак Мінфіна, за тры кварталы 2014 даход "Пінскага мясакамбіната" ад рэалізацыі прадукцыі склаў 718 млрд рублёў, чысты прыбытак - 17,8 млрд.

У апошні час управа справамі Лукашэнкі актыўна абрастае перспектыўнымі актывамі. Пад крыло ўстановы Шэймана перайшлі кампанія "Малочны гасцінец", створаная на базе менскага гармалзавода №2, агракамбінат "Мачулішчы" і Парытэтбанк. Кампанія "Белзамежгандль" стала актыўна займацца аптовым гандлем нафтапрадуктамі, а ў планах - стварэнне даччынага прадпрыемства для перапрацоўкі нафты. У перспектывах таксама значыцца аптова-раздробны гандаль і сельскагаспадарчай прадукцыяй (малочная прадукцыя, мяса, птушка).