Суд Лівіі прыгаварыў сына Кадафі да смяротнага пакарання
9- 28.07.2015, 14:25
- 9,345
Суд у Лівіі вынес смяротны прысуд сыну былога дыктатара краіны Муамара Кадафі Сейф аль-Ісламу.
Пра гэта паведамляе «Інтэрфакс» са спасылкай на тэлеканал «Аль-Арабійя».
Акрамя яго да смерці прысуджаныя яшчэ некалькі высокапастаўленых чыноўнікаў, якія займалі пасады пры рэжыме Муамара Кадафі.
Паводле выраку суда, усе асуджаныя павінны быць расстраляныя.
Сейф аль-Іслам Кадафі быў узяты ў палон атрадамі былых паўстанцаў у лістападзе 2011 года і з гэтага моманту яго трымаюць пад арыштам і адмаўляюцца перадаваць цэнтральнаму ўраду ў Трыпалі. Суд над ім пачаўся ў студзені 2013 года.
Лівійскія ўлады абвінавачвалі Сейф аль-Іслама Кадафі ў карупцыі і ваенных злачынствах. Гэта не адзіныя абвінавачванні супраць сына дыктатара: міжнародны крымінальны суд ужо даўно абвінавачвае яго ў злачынствах супраць чалавечнасці і дамагаўся выдачы для правядзення судовага працэсу ў Гаазе. Аднак кіраўніцтва краіны адмовілася выконваць гэты запыт, настойваючы на неабходнасці судзіць Сейф аль-Іслама Кадафі на радзіме.