Кіраўнік МЗС Эстоніі: Еўрапейскі звяз падоўжыць санкцыі супраць Расеі
- 5.09.2015, 21:39
- 64,867
Міністарка замежных спраў Эстоніі Марына Кальюранд выступіла за ўзмацненне жорсткасці санкцыі ў дачыненні да Расеі.
Пра гэта паведамляе «Інтэрфакс».
«Менскія пагадненні з'яўляюцца асновай пошуку развязання канфлікту на Украіне, аднак Расея дагэтуль толькі прадаўжала агрэсіўныя і дэстабілізуючы паводзіны ва ўкраінскім напрамку», - заявіла яна, выступаючы ў суботу ў Люксембургу на неафіцыйнай сустрэчы кіраўнікоў МЗС ЕЗ.
З яе слоў, «Еўрапейскі звяз падоўжыць санкцыі датуль, пакуль усе патрабаванні Менскіх пагадненняў не будуць выкананыя».
Яна падзякавала калегам з ЕЗ за падтрымку ў пытанні пра супрацоўніка паліцыі бяспекі Эстоніі Эстана Кохвера, прысуджанага ў Расеі да 15 гадоў за шпіянаж.
Міністарка адзначыла, што ў суботу спаўняецца роўна год, як Кохвера выкралі з тэрыторыі Эстоніі. «Мы прадаўжаем пры падтрымцы партнёраў і хаўруснікаў патрабаваць вызвалення Эстана Кохвера датуль, пакуль ён не вернецца бяспечна да сваёй сям'і», - сказала кіраўніца МЗС.