The New York Times даведалася аб планах ЗША ўзмацніць войскі ў Еўропе

Вашынгтон плануе істотна ўзмацніць амерыканскі кантынгент у Еўропе з мэтай «паслаць сігнал» Маскве, піша The New York Times.

Са слоў крыніц выдання, на гэтыя мэты накіруюць $3,4 млрд.

Вашынгтон плануе істотна павялічыць разгортванне цяжкага ўзбраення і бронетэхнікі ў краінах Цэнтральнай і Усходняй Еўропы, піша The New York Times Times са спасылкай на крыніцы ў адміністрацыі прэзідэнта ЗША.

Паводле інфармацыі суразмоўцаў выдання, у Белым доме плануюць вылучыць на вайсковыя выдаткі ў Еўропе ў 2017 годзе больш за $3,4 млрд., што ў некалькі разоў перавышае існыя выдаткі $789 млн., паведамляе РБК.

Зброя і абсталяванне будуць выкарыстоўвацца амерыканскімі войскамі і сіламі NATO ў Еўропе. Суразмоўца The New York Times у адміністрацыі Абамы заявіў, што павелічэнне сіл NATO ў рэгіёне разлічана на тое, каб паслаць сігнал расейскаму прэзідэнту Уладзіміру Пуціну. «Гэта доўгатэрміновая рэакцыя на змены ў бяспецы ў Еўропе. Гэта адлюстроўвае новую сітуацыю, у якой Расея гуляе больш складаную ролю», - адзначыла крыніца выдання.

Крыніца The New York Times у Пентагоне распавяла, што дадатковыя сілы і абсталяванне могуць быць разгорнутыя ў такіх краінах Еўропы, як Вугоршчына, Румынія і краіны Балтыі.

Адзін з суразмоўцаў выдання ў Белым доме заявіў, што такі крок неабходны для таго, каб даць зразумець Маскве, што NATO будзе рабіць усё, што трэба, каб абараніць краіны-ўдзельніцы альянсу Усходняй Еўропы, якія заклапочаныя суседствам з Расеяй. «Ухваліўшы гэты бюджэт, мы выканаем абяцанні, якія мы давалі NATO аб калектыўнай абароне альянсу», - падкрэсліла крыніца газеты ў Пентагоне.

Прадстаўнікі адміністрацыі таксама заявілі The New York Times, што новыя інвестыцыі скіраваныя не толькі на стрымліванне Расеі. Зброя і абсталяванне таксама могуць быць разгорнутыя ўздоўж паўднёвых межаў NATO, дзе яны маглі б дапамагчы ў барацьбе супраць «Ісламскай дзяржавы» ці ў барацьбе з прытокам мігрантаў з Сірыі.

Міністр абароны ЗША Эш Картэр у аўторак, 2 лютага, выступіць перад сябрамі эканамічнага клуба ў Вашынгтоне, дзе раскажа пра прыярытэты Пентагона. Агулам праект бюджэту на 2017 фінансавы год, які пачынаецца 1 кастрычнік 2016 г., адміністрацыя Абамы мае намер прэзентаваць 9 лютага.

Як паведамляла агенцтва Reuters, чакаецца, што Картэр у сваім выступе паведаміць аб намеры на просьбу адміністрацыі павялічыць сродкі на барацьбу з «Ісламскай дзяржавай», а таксама закране іншыя бюджэтныя прыярытэты, у тым ліку павелічэнне выдаткаў для таго, каб супакоіць еўрапейскіх хаўруснікаў, занепакоеных вайсковым канфліктам на Украіне, і для захавання вайсковай перавагі ЗША над Кітаем і Расеяй.

Са слоў крыніц Reuters, у 2017 фінансавым годзе бюджэт Пентагона запатрабуе больш за $7 млрд. для барацьбы з ІД. Гэта прыкладна на 35% больш за тую суму, якая закладзеная на гэтыя мэты сёлета. Усяго праект бюджэту Злучаных Штатаў на будучы год прадугледжвае выдзяленне на абарону $583 млрд.