Праз трызненне віцэ-прэм'ера з АНТ звальняюць журналістку

Праз словы віцэ-прэм'ера Калініна журналістку АНТ адхілілі ад эфіру, ёй пагражае звальненне.

Як паведамілі «Нашай Ніве» інфармаваныя крыніцы, журналістку тэлеканала АНТ на месяц адхілілі ад эфіру за тое, што яна паставіла ў навіны словы віцэ-прэм'ера Калініна пра «самыя сучасныя трафікі».

Таксама за гэты час павінна развязвацца пытанне аб яе звальненні з канала.

Паведамляецца, што заўвагі да яе працы ў кіраўніцтва АНТ былі і раней, але інцыдэнт з віцэ-прэм'ерам стаў апошняй кропляй.

«Усе сінхроны [фрагменты інтэрв'ю - рэд.] трэба выпісваць словамі, каб было зручней мантаваць. А яна гэтага не зрабіла, паставіўшы так. Вось у чым заключаецца парушэнне вытворчага працэсу. Не тое, што яе пакаралі менавіта за словы Калініна, быў адыход ад інструкцыі», - паведаміла наша крыніца.

Трохі раней кіраўнік інфармацыйнага вяшчання АНТ Руслан Паддубскі назваў фрагмент з Калініным у эфіры канала «чыстай нядбайнасцю журналіста» і паабяцаў прымяніць «дысцыплінарныя меры».