Падчас ваенных вучэнняў застрэлілі грыбніка

Мужчына загінуў ад агнястрэльнага ранення каля вайсковага стрэльбішча ў Смаргонскім раёне.

«Упраўленнем Следчага камітэта па Гродзенскай вобласці ўзбуджана крымінальная справа па арт.144 ч.1 КК Рэспублікі Беларусь (прычыненне смерці па неасцярожнасці) па факце гібелі жыхара Смаргоні, 1952 года нараджэння, які збіраў грыбы», - паведаміў агенцтву «Інтэрфакс-Захад» у чацвер афіцыйны прадстаўнік Следчага камітэта па Гродзенскай вобласці падпалкоўнік юстыцыі Сяргей Шаршаневіч.

«11 верасня 2012 года аб невядомым знікненні мужчыны паведаміла яго жонка, пасля чаго Смаргонскі РАУС сумесна з супрацоўнікамі органаў памежнай службы арганізавалі пошукавыя работы. Труп адшукваемага быў знойдзены 12 верасня ў лясным масіве недалёка ад вайсковага стрэльбішча навучальнага цэнтра ДУА «Інстытут памежнай службы Рэспублікі Беларусь» , на якім 11 верасня 2012 года праходзілі вучэбныя стрэльбы з розных відаў зброі», - распавёў Шаршаневіч.

«У ходзе расследавання крымінальнай справы атрыманыя дадзеныя аб тым, што, займаючыся зборам грыбоў, мужчына, які загінуў, ішоў на вайсковае стрэльбішча, але вайскоўцы паста ачаплення забаранілі яму праход, папярэдзіўшы аб стрэльбах», - адзначыў прадстаўнік УСК.

«У мэтах высвятлення ўсіх абставінаў таго, што адбылося, следчыя зрабілі агляд месца здарэння, дапытваюцца асобы, паказанні якіх важныя для ўстанаўлення ісціны. Прызначаны шэраг экспертыз. З цела загінулага судовыя медыкі вынялі два металічных асколка боепрыпасаў», - паведаміў Шаршаневіч.