Экалагічны цэнтр у Менску пад пагрозай высялення
11- 5.10.2013, 12:02
- 11,341
Для аранжарэі з рэдкімі раслінамі і мноствам жывёл давядзецца шукаць іншае месца праз ушчыльненне забудовы.
- Нас будуць зносіць! - скардзіцца «Камсамольскай праўдзе ў Беларусі» Лідзія Каліноўская, дырэктарка Рэспубліканскага эколага-біялагічнага цэнтра (былой станцыі юных натуралістаў). - Калі прыйдуць, куды нам жывёл падзець? Паўліны, цасаркі, вальеры, корм... Мы не можам усё гэта кінуць!
Цэнтр працуе ў Менску ўжо 83 гады. Тут ёсць некалькі садоў, дэндрарый, аранжарэя, міні-заапарк і жывы куток. Тут жывуць паўліны, папугаі, трусы, шыншылы і іншыя жывёлы. Кожны год сюды прыходзіць больш за тысячу дзяцей, каб пазнаёміцца з прыродай. Але, падобна, што хутка гаспадарку прыйдзецца звярнуць.
Менгарвыканкам яшчэ ў лютым абвясціў конкурс на праектаванне і будаўніцтва шмат функцыянальнага комплексу з жылымі дамамі на скрыжаванні вуліцы Макаёнка і праспекта Незалежнасці, размясціўшы аб'яву аб конкурсе на сваім сайце. Праўда, тады ва ўмовах значылася «захаванне будынка Рэспубліканскага эколага-біялагічнага цэнтру, цяпліцы і гадавальніка гэтага цэнтру». У конкурсе выйграла сербская кампанія «Зомекс Інвестмент», якая ўжо будуе ў Менску комплекс «Маяк Менска». Работы ў зносе ўзяўся выконваць менскі «Гардарбуд».
- Улетку мы пачалі атрымліваць лісты: спачатку нам сказалі падаць дакументы на пабудовы, а потым падрыхтаваць пад знос гараж, парнікова-цяплічны комплекс і іншыя будынкі, - распавядае Лідзія Паўлаўна. - Мы пісалі і ў «Гардарбуд», і ў «Зомекс Інвестмент», і мэру горада. У мэра мы папрасілі растлумачыць, дзе пройдзе новая мяжа нашай тэрыторыі. Нам адказалі, што плануецца рэканструкцыя тэрыторыі вучэбнага корпуса эколага-біялагічнага цэнтра, гадавальнікаў і аранжарэі пад агульнаадукацыйную школу.
Выходзіць, што цэнтру прыйдзецца не толькі падрыхтаваць цяпліцы і дапаможныя пабудовы пад знос, але і вызваліць галоўны корпус пасля гэтага. Цяпер цэнтр яшчэ працуе, але пра будучыню супрацоўнікі імкнуцца не гаварыць.
- У нас унікальныя калекцыі, якія пойдуць проста пад нож. Ахоўныя расліны, рэдкія віды, нам жа трэба ведаць, куды іх пераносіць, - тлумачыць Лідзія Паўлаўна. - Калі б нам хаця б сказалі: цэнтр будзе ў Лошыцы, вось вам гектар зямлі, пераносьце дрэвы і рабіце ўсё што трэба. Але куды пераязджаць - мы не ведаем.
Тэрмін будаўніцтва школы пакуль не вызначаны
- Будаўніцтва школы будзе ажыццёўлена пасля будаўніцтва жылога комплексу за кошт бюджэтных сродкаў горада. Тэрмін будаўніцтва і праектавання школы пакуль не вызначаны, - распавялі ў Менгарвыканкаме.
У афіцыйным лісце, які экалагічны цэнтр атрымаў ад Менгарвыканкама, гаворыцца:
«Для падбору кампенсацыйнага ўчастка ў адпаведнасці з рэгламентамі генеральнага плана г. Менска (...) УА «Рэспубліканскі эколага-біялагічны цэнтр» неабходна звярнуцца ў УП «Менскграда», падаўшы падрабязнае планавае заданне».