Нафтахімічную галіну скаланаюць карупцыйныя скандалы

Услед за затрыманнем намесніка дырэктара «Белнафтахіма» стала вядома пра арышты на «Белшыне».

Следчы камітэт пачаў некалькі крымінальных спраў у дачыненні да службовых асоб найбуйнейшага беларускага вытворцы шын і афіляваных з імі бізнесменаў, сярод якіх ёсць нават дырэктар расейскай кампаніі. Нанесены імі ўрон ужо пераваліў за мільярд рублёў, піша «Ежедневник».

У працэсе аб'яднання розных вытворчасцяў засталіся толькі дзве крымінальныя справы, адна з якіх знаходзіцца на расследаванні ў Бабруйскім міжраённым аддзеле, а другая - у цэнтральным апараце СК.

Па першай крымінальнай справе галоўным падазраваным лічыцца начальнік бюро забеспячэння металам ААТ «Белшына», якому інкрымінуецца здзяйсненне злачынства па ч.3 арт.426 Крымінальнага кодэкса Беларусі (перавышэнне ўлады або службовых паўнамоцтваў, здзейсненае асобай, якая займае адказнае становішча, якое пацягнула цяжкія наступствы). Па дадзеных праваахоўных органаў, службовая асоба прадпрыемства, па змове з нявызначанымі асобамі правярнула ў сакавіку-лістападзе 2012 года шэраг сумніўных аперацый з металаломам, у выніку чаго прадпрыемству быў нанесены ўрон у памеры больш за 465 мільёнаў рублёў.

Па другой крымінальнай справе галоўным падазраваным праходзіць былы намеснік начальніка аддзела матэрыяльна-тэхнічнага забеспячэння ААТ «Белшына». Яму інкрымінуецца здзяйсненне злачынства па ч.4 арт.210 Крымінальнага кодэкса Беларусі (крадзеж шляхам злоўжывання службовымі паўнамоцтвамі, здзейснены арганізаванай групай альбо ў асабліва буйным памеры). Паводле дадзеных Галоўнага ўпраўлення па барацьбе з эканамічнымі злачынствамі (ГУБЭЗ) МУС, падазроны па змове з двума бізнесменамі, якія праз свае структуры маюць дамоўныя ўзаемаадносіны з ААТ «Белшына», здзейснілі крадзеж сродкаў прадпрыемства ў памеры больш за 514 мільёнаў рублёў. Цікава, што арыштаваныя цяпер бізнесмены апынуліся замяшаныя і ў іншых схемах крадзяжу сродкаў беларускіх прадпрыемстваў.

У апошні час МУС і Следчы камітэт надаюць асаблівую ўвагу як самому канцэрну «Белнафтахім», так і яго прадпрыемствам. Пачалося ўсё яшчэ ў сакавіку, калі УСК па Віцебскай вобласці па матэрыялах БЭЗ УУС Віцебскага аблвыканкама была ўзбуджаная крымінальная справа па ч.4 арт.210 Крымінальнага кодэкса Беларусі ў дачыненні да намесніка начальніка цэха завода «Палімір» ААТ «Нафтан». Ён абвінавачваўся ў здзяйсненні крадзяжу на суму больш за 80 мільёнаў рублёў.

Затым зноў жа ў сакавіку УБЭП УУС Магілёўскага аблвыканкама знайшло злоўжыванні з боку дырэктара філіяла «Белшына-Агра» ААТ «Белшына», і абвінаваціла яго ў прычыненні шкоды ў памеры 130 мільёнаў рублёў. Пасля гэтага аператыўныя службы МУС прыйшлі на саму «Белшыну», а таксама пачалі прыглядацца да дзейнасці канцэрна «Белнафтахім», які наогул знаходзіўся па-за сферай інтарэсаў праваахоўных структур больш за 5 гадоў.

Учора стала вядома пра затрыманне намесніка старшыні канцэрна «Белнафтахім», якому інкрымінуецца атрыманне хабару ў памеры 19 тысяч даляраў.

Гэтыя справы вельмі добра адлюстроўваюць тэндэнцыю. Пасля пяцігадовага перапынку ў праваахоўных органаў Беларусі прачнулася нечаканая цікавасць да нафтахімічнай галіны краіны. З чым гэта звязана, пакуль невядома.

Фота: interfax.by