«Стоп-падатак». Нямы плаціць двойчы

У канцы працоўнага дня пятніцы, 20 снежня, аўтамабілісты плануюць перакрыць праспект Незалежнасці.

Пятніца 20 снежня, 18.00 - такая дата пазначаная на старонцы аднаго з карыстальнікаў сацыяльнай сеткі Facebook для правядзення акцыі «Стоп-падатак» у выглядзе аўтамабільнага затору на праспекце Незалежнасці. Падобныя дзеянні 7 чэрвеня 2011 года ў рамках акцыі «Стоп-бензін», арганізаванай інфармацыйна-асветніцкай установай «За аўто» паралізавалі аўтамабільны трафік на праспекце на некалькі гадзін.

«Ежедневник» звярнуўся да старшыні «За аўто» Арцёма Шаркова з пытаннямі - чаго чакаць вечарам 20 снежня, ці падтрымлівае ініцыятыву і ці паедзе на праспект сам.

- Калі пачулі пра правядзенне акцыі «Стоп-падатак» у выглядзе стварэння штучнага затора на вуліцах Менска?

- Некалькі дзён таму - патэлефанаваў знаёмы, пацікавіўшыся, ці не я арганізую гэтую акцыю.

- Ухваляеце тое, што можа адбыцца ў Менску?

- Як дэманстрацыю народнай думкі і актыўнасць грамадзян - так. Вось толькі сама па сабе акцыя можа нічога не значыць, патрэбная яе каардынацыя, выразна пастаўленая мэта, задачы. Усё гэта пакуль не ясна - аж да асоб арганізатараў.

- Пасля таго, як 7 чэрвеня 2011 года трафік на праспекце Незалежнасці спыніўся на некалькі гадзін, Лукашэнка даў указанне «адкруціць» кошты на паліва, якія падскочылі на траціну. Як дабіцца аналагічнага выніку невядомым пакуль арганізатарам акцыі «Стоп-падатак»?

- Вы згадалі самы ўдалы дзень, якому папярэднічала доўгая праца, звязаная з ліставаннем, правядзеннем круглых сталоў, фармуляваннем пазіцый. Характар цяперашняй акцыі, хутчэй за ўсё, будзе спантанным. Для выніку неабходна сфармуляваць нейкія прапановы, напрыклад - уключыць падатак у кошт бензіну, пачаць перамовы з уладамі. Прычым не з Мінфінам - выканаўцам, а адміністрацыяй Лукашэнкі ці Мінтрансам, магчыма, Белаўтадарам.

Трэба прыцягнуць увагу розных груп і розных інтарэсаў. У выпадку з МУС і праваабарончымі арганізацыямі гэта нескладана. Калі ж мэта - увага Адміністрацыі прэзідэнта, асабіста Аляксандра Лукашэнкі, распрацоўшчыкаў указа, трэба дзейнічаць іншым спосабам - уступаць з імі ў ліставанне, запрашаць на круглыя сталы. Толькі сістэмнай працай можна дабіцца выніку - перагледзець практычна прыняты закон.

- Нешта не ўзгадаю, каб круглыя сталы, якія праводзяцца грамадзянскай ініцыятывай «За аўто», мелі вынік хоць колькі-небудзь параўнальны з тым, што адбылося 7 чэрвеня...

- Не скажу, што праца з органамі не прыносіць выніку. Пытанне кошту бензіну прапрацоўваўся намі з траўня 2010 года - памятаеце першыя акцыі на АЗС, калі за паліва расплачваліся дробнымі купюрамі? Мы праводзілі круглыя сталы, вялі ліставанне, хадзілі на асабістыя сустрэчы ў Белнафтахім, Мінтранс і інш. Пра нас ведалі, проста рэакцыі не было. Затое «Стоп-падатак» адразу хоча паказаць свой ашчэр, кажучы, што падатак не патрэбны.

Падатак будзе. Гэта адна з антыкрызісных мер, накіраваных на папаўненне казны. Шкада, што ўлада не даносіць сваю пазіцыю, растлумачваючы свае дзеянні. Што перашкаджала абмеркаваць новаўвядзенне з зацікаўленымі грамадзянамі, прадстаўнікамі грамадзянскай супольнасці, растлумачыць механізм збірання падатку? Нельга, каб усё адбывалася так, як цяпер.

- Што ж тычыцца дзеянняў ініцыятараў «Стоп-падатак», парэкамендуеце не пачынаць з аўтамабільных затораў?

- Яны пачалі не з затораў, а са збору подпісаў пад петыцыяй на імя міністра фінансаў Андрэя Харкаўца. З такім жа поспехам можна напісаць міністру сельскай гаспадаркі - Харкавец нічога не вырашае. І потым, казаць пра поспех акцыі, не ведаючы яе лідараў, нельга. Добра, вядома, што грамадства можа самаарганізавацца праз ананімныя крыніцы, буду рады, калі рашэнне аб дзяржпошліне адменяць.

- Ці ёсць шанцы на арганізацыю акцыі, пра якую добра вядома праваахоўнікам?

- Міліцыя навучылася актыўна процідзейнічаць, а значыць, для поспеху акцыі патрэбныя скаардынаваныя дзеянні, якіх пакуль не бачу. Нас таксама адсочвалі - з моманту правядзення першай акцыі ў 2010 годзе на АЗС. Аказвалі супрацьдзеянне, штрафавалі, затрымлівалі, ставілі машыны на штраф-стаянкі. Цяпер памерлы начальнік ДАІ МУС РБ Максім Падбярозкін прасіў не ўдзельнічаць у акцыях, тагачасны намеснік начальніка ГУУС Менгарвыканкама палкоўнік міліцыі Ігар Яўсееў браў падпіскі аб няўдзеле ў акцыі. Але праца ішла.

- Што параіце людзям, якія хочуць арганізаваць акцыю «Стоп-падатак»?

- Выйсці з ценю і дзейнічаць адкрыта, сфармуляваць ясную мэту, запрашаць ўладу да абмеркавання праблемы. Без гэтага выніку не будзе.

- Самі на акцыю плануеце ехаць?

- Так.

Нагадаем, у сацыяльных сетках заклікаюць да вулічных акцый супраць пошліны на аўто.

У сацсетках і на форумах беларускіх інтэрнэт-парталаў з'явіліся заклікі да правядзення акцыі пратэсту супраць ўвядзення новай пошліны на аўто.

«Стоп-падатак. Пятніца 20 снежня, 18:00, Праспект Незалежнасці - Менск. Астатнія гарады - галоўныя плошчы. Не будзь скотам, не дай сябе абрабаваць», - пішуць карыстальнікі.

Рэпост паведамлення набірае абароты не толькі ў сацсетках, але і на форумах інфармацыйных рэсурсаў.

Менчукі прапануюць аўтамабілістам пасля 17.30 рухацца да Плошчы Незалежнасці з любога кірунку. Роўна ў 18.00 удзельнікам акцыі прапануюць знізіць хуткасць, спыніцца, уключыць «аварыйку» і сігналіць. Пешаходаў таксама заклікаюць падтрымаць акцыю.