Брэсцкі гінеколаг трапіў пад следства за хабар у $300
63- 28.01.2014, 15:02
- 7,141
Крымінальная справа распачатая ў дачыненні да ўрача-гінеколага з Брэста.
«Упраўленнем Следчага камітэта па Брэсцкай вобласці распачатая і расследуецца крымінальная справа па ч.1 арт.433 (Прыняцце незаконнага ўзнагароджання) у дачыненні да ўрача адной з устаноў аховы здароўя Брэста», - паведаміў агенцтву «Інтэрфакс-Захад» у аўторак афіцыйны прадстаўнік УСК па Брэсцкай вобласці Руслан Макарук.
«Следствам устаноўлена, што лекар акушэр-гінеколаг дзяржаўнай установы аховы здароўя, знаходзячыся на працоўным месцы, выконваючы свае прафесійныя абавязкі, звязаныя з кансультаваннем, абследаваннем, лячэннем жанчын у сувязі з планаванай цяжарнасцю, прыняў незаконнае матэрыяльнае ўзнагароджанне ў выглядзе грашовых сродкаў у памеры 300 даляраў ЗША ад пацыенткі за магчымасць ажыццяўлення медыцынскага назірання, то бок, за выкананне паслугі, аказанне якой уваходзіла ў круг працоўных абавязкаў лекара», - удакладніў Макарук.
У цяперашні час, па яго словах, выконваюцца ўсе неабходныя следчыя дзеянні.