МЗС Кітая: Мы паважаем тэрытарыяльную цэласнасць Украіны
29- 2.03.2014, 17:31
- 33,025
Кітай глыбока заклапочаны сітуацыяй, якая склалася ва Украіне.
Пекін заклікае зацікаўленыя бакі імкнуцца да палітычнага развязання рознагалоссяў з дапамогай дыялогу і перамоў на аснове павагі міжнароднага права і нормаў міжнародных стасункаў для забеспячэння міру і стабільнасці ў рэгіёне, заявіў сёння афіцыйны прадстаўнік МЗС КНР Цынь Ган.
Так кітайскі дыпламат пракаментаваў паводле просьбы журналістаў сітуацыю, якая склалася ва Украіне, паведамляе «Сіньхуа».
Савет федэрацыі Расеі 1 сакавіка даў згоду прэзідэнту РФ Уладзіміру Пуціну на выкарыстанне ўзброеных сілаў Расеі на тэрыторыі Украіны ў сувязі з пагрозай жыцця расейскім грамадзянам, суайчыннікам і асабістаму складу вайсковага кантынгенту войскаў Расеі ў гэтай краіне.
«Мы вельмі асуджаем гвалтоўныя акты, якія ўзніклі ў папярэднія дні ва Украіне», - адзначыў Цынь Ган, дадаўшы, што Кітай заўсёды заклікаў зацікаўленыя бакі Украіны да мірнага развязання ўнутраных рознагалоссяў у рамках закона, рэальнай абароны законных інтарэсаў украінскага народа розных нацыянальнасцяў і больш хуткага аднаўлення звычайнага рэжыму сацыяльнага парадку.
Кітай здаўна прытрымліваецца прынцыпу неўмяшання ва ўнутраныя справы, паважае незалежнасць, суверэнітэт і тэрытарыяльную цэласнасць Украіны, канстатаваў ён.
Кітайскі бок будзе пільна сачыць за ходам развіцця сітуацыі ва Украіне, адзначыў прадстаўнік кітайскага знешнепалітычнага ведамства.