Беларусь пазбаўляецца ад украінскага піва

Пасля ўвядзення ліцэнзавання імпарту піва, экспарт гэтай прадукцыі ўкраінскімі прадпрыемствамі практычна цалкам спыніўся.

Пра гэта паведамляе газета «Грошы плюс».

З 1 траўня Беларусь увяла новыя правілы імпарту хмельнага напою. З гэтага часу ўкраінскія пастаўшчыкі перад выхадам на беларускі рынак абавязаны атрымаць ліцэнзію, у якой канцэрн «Белдзяржхарчпрам» паказвае аб'ёмы дазволенага імпарту і цэны, па якіх павінна прадавацца прадукцыя. Прычым, для кожнай кампаніі ўмовы ўсталёўваюцца індывідуальна.

Адпаведныя меры беларускія ўлады прынялі пасля расследавання сітуацыі на піўным рынку, падчас чаго высветлілася, што многія імпарцёры, у тым ліку, украінскія, пастаўляюць у Беларусь піва па дэмпінгавых цэнах.

Учора, 24 чэрвеня, украінскі вытворца піва «Оболонь» першым атрымаў ліцэнзію для выхаду на беларускі рынак. Кіраўніцтва «Оболонь» адзначае, што ўмовы на пастаўкі піва вельмі невыгодныя для ўкраінскай кампаніі. Беларускія чыноўнікі патрабуюць падняць раздробныя цэны больш чым у 2 разы. Так, калі раней бутэлька ўкраінскага піва 0,5 л каштавала ў беларускіх крамах блізу 0,4 дал, то цяпер яе кошт павінны вырасці да 0,8 дал. Цэны на хмельны напой у пластыкавай двухлітровай тары падвысяцца з 0,82 дал да 1, 74 дал.

На думку ўкраінскіх півавараў, гэтыя дзеянні беларускіх уладаў перашкаджаюць асноўным прынцыпам канкурэнцыі і ствараюць няроўныя ўмовы для ўкраінскага піва на рынку Беларусі.

Тым часам беларускія вытворцы хмельнага напою пачалі атрымліваць значны прыбытак ад новаўвядзенняў на ўнутраным рынку. Так, у траўні яны змаглі рэалізаваць рэкордныя аб'ёмы піва - амаль 4 млн дал, што на 2,5% больш, чым за аналагічны перыяд 2014 года.

Але, абмежаванні, уведзеныя Беларуссю, пагражаюць для ўкраінскіх экспарцёраў новымі стратамі, паколькі вытворчасць хмельнага напою ва Украіне з пачатку гэтага года і без таго пачала скарачацца. Паводле звестак профільнай асацыяцыі «Укрпиво» са студзеня да траўня 2014 года было разліта 102 млн дал піва, што на 10,4% менш, чым за аналагічны перыяд мінулага года. Да таго ж, улічваючы, што з 1 траўня акцызы на піва выраслі на 42,5%, а раздробны кошт хмельнага напою падняўся ў сярэднім на адну грыўню за бутэльку 0,5 л, то рост продажаў у найбліжэйшай будучыні з'яўляецца малаверагодным.

Адначасова з увядзеннем абмежаванняў на пастаўкі ўкраінскага піва, Беларусь рэзка павялічыла экспарт свайго хмельнага напою ва Украіну. Украінская ўлада пакуль не разглядае магчымасці ўвядзення мер у адказ.