Сепаратысты рыхтуюць наступ на Марыупаль
27- 24.08.2014, 18:05
- 53,777
Прыкрыццё ім забяспечвае артылерыя з тэрыторыі Расеі.
Пра гэта паведаміў народны дэпутат Вярхоўнай Рады Украіны Алег Ляшко ў сваім акаўнце ў сацыяльнай сетцы "Фэйсбук".
"Дзве ночы запар з расейскай тэрыторыі абстрэльвалі нашу памежную заставу "Сядоў" у Новоазоўскім раёне Данецкай вобласці. У выніку застава знішчаная цалкам, ёсць забітыя і параненыя сярод памежнікаў і добраахвотнікаў з батальёна "Днепр-1". Відавочна, расейскія акупанты рыхтуюць наступ на Марыупаль і Прыазоўе агулам", - паведаміў Ляшко.
Крыніцы ў асяроддзі сепаратыстаў раней паведамілі, што яны пачалі баі за выхад да Азоўскага мора ў раёне Новаазоўск. У ДНР заяўляюць, што пасля працяглых баёў перайшлі ў наступ і блакавалі дзве групоўкі ўкраінскіх войскаў.
Складаная сітуацыя захоўваецца ў памежных раёнах на поўдні Данецкай вобласці. З пансіянатаў у Сядоў сталі ў экстраным парадку выязджаць людзі. Акрамя таго, вядзецца абстрэл у сёлах Халоднае і Абрыў. У Марыупалі адкрываюць бамбасховішчы.