У Сочы замарозілі кошты на час алімпіяды
1- 3.10.2013, 11:23
- 6,856
Урад Расеі замарозіў кошты на шэраг паслуг у Сочы на час Алімпійскіх і Паралімпійскіх гульняў.
Адпаведная пастанова апублікаваная на сайце Белага дома. З 1 лістапада 2013 па 16 красавіка 2014 года не будуць даражэць чыгуначныя і авіяперавозкі - як пасажырскія, так і грузавыя - да і ад станцый і аэрапортаў на тэрыторыі ўсяго Краснадарскага краю. Акрамя таго, з 7 студзеня па 16 красавіка застанецца нязменным кошт таксі і маршрутак у Сочы. Нарэшце, на гэты ж час у горадзе будуць замарожаныя кошты на паслугі хімчыстак і пральняў, пішуць Grani.ru.
Забяспечыць выкананне дакумента даручана Мінтрансу і адміністрацыі Сочы.
Напярэдадні прадстаўнік ФСБ Аляксей Лаўрышчаў заявіў, што арганізатары сочынскай Алімпіяды прыкладуць максімум намаганняў, каб сітуацыя не развівалася па «бразільскім сцэнары». Сілавік адзначыў, што негатыўны вопыт правядзення Кубка канфедэрацый у Бразіліі, падчас якога ў акцыях пратэсту ўдзельнічала больш за мільён чалавек, будзе ўлічаны.
Па словах Лаўрышчава, узмоцненыя меры бяспекі і стварэнне «закрытых зон» накіраваныя на забеспячэнне спрыяльнай працы арганізатараў і гасцей гульняў. «Жыццядзейнасць горада па-за гэтых зон нічым не будзе адрознівацца ад звычайнай. Для зручнасці перамяшчэння жыхароў і гасцей Сочы будуць створаныя дадатковыя ўмовы. У якасці кампенсацыі пабудаваныя асобныя ўчасткі чыгункі і будзе запушчаная асобная электрычка», - адзначыў ён.