Прэм'ер Турцыі заплакаў у прамым эфіры (Відэа)

Турэцкі прэм'ер-міністр Тайіп Эрдаган не змог стрымаць слёз: ён расплакаўся ў прамым эфіры тэлепраграмы, прысвечанай напружанай сітуацыі ў Егіпце.

Ён расплакаўся, калі слухаў пасланне прадстаўніка руху «Браты-мусульмане» Махамеда аль-Бетагі, адрасаванае дачцы Асме.

Аль-Бетагі страціў сваю 17-гадовую дачку: дзяўчына загінула ў ходзе разгону дэманстрацыі ў падтрымку зрынутага прэзідэнта Мухамеда Мурсі. У сваім лісце егіпецкі палітык прызнаўся, што шкадуе пра тое, што не мог праводзіць з дачкой больш часу з-за працы. Эрдаган распавёў, што таксама мала часу надае сваім дзецям, піша «Комсомольская правда в Беларуси».

«Звычайна я прыходжу дадому ў раёне гадзіны або двух ночы, калі яны ўжо спяць. Слухаючы пасланне аль-Бетагі, я думаў пра сваіх малышоў», - заявіў прэм'ер Турцыі. Пры гэтым ён выказаў надзею, што гэты страшны вопыт для многіх паслужыць урокам.

Нагадаем, беспарадкі ў Егіпце не сціхаюць другі тыдзень. Усё пачалося з таго, што ў сераду, 14 жніўня, паліцыя правяла аперацыю па расчыстцы вуліц Каіра ад прыхільнікаў зрынутага кіраўніка дзяржавы Мурсі. Вартавым парадку даводзілася ўжываць слёзацечны газ і з дапамогай бронетэхнікі ламаць умацаванні вакол лагераў. Аперацыя скончылася крывавымі сутыкненнямі.

Ахвярамі жорсткіх сутыкненняў дэманстрантаў з супрацоўнікамі сіл бяспекі па ўсёй краіне сталі больш за 800 чалавек.

Часовыя ўлады Егіпта ўвялі надзвычайнае становішча тэрмінам на месяц і ўстанавілі каменданцкую гадзіну ў некаторых правінцыях краіны.