Лукашэнка: Заробак чыноўнікам трэба падвышаць, але не выпінаць

Дыктатар мяркуе, што падвышаць заробак дзяржаўным служачым неабходна за кошт аптымізацыі і скарачэння дзяржапарату.

Такое меркаванне Аляксандр Лукашэнка выказаў 27 студзеня падчас кадравых прызначэнняў, паведамляе БелТА.

«У нас няпростая сітуацыя і з аплатай працы дзяржаўных служачых, перш за ўсё чыноўнікаў. Ніколі яшчэ мы не правальваліся і не адставалі ад сярэднямесячнага заробку ў прамысловасці і ніколі не было такой прапорцыі з сярэднім заробкам у краіне. Мы сур'ёзна адстаём. Але вы разумееце, што ў гэты час калі мы пачнем выпінаць заробак дзяржслужачых, то атрымаем адпаведную рэакцыю народа», - сказаў Лукашэнка.

Ён мяркуе, што заробак дзяржслужачых падвышаць трэба, але за кошт аптымізацыі, скарачэння дзяржаўнага апарату, мінімізацыі тых функцый, якія дзяржапарат павінен выконваць. «Ісці трэба толькі гэтым шляхам», - упэўнены Лукашэнка.